مجلة الوقت العربي - قصيدة : يا دين أمــــــي ))) الشاعر المصري : كريم فريد
كاتب الموضوع
رسالة
رئيس التحرير Admin
المساهمات : 310 تاريخ التسجيل : 28/08/2013
موضوع: مجلة الوقت العربي - قصيدة : يا دين أمــــــي ))) الشاعر المصري : كريم فريد الخميس أبريل 10, 2014 8:05 am
بقلم الشاعر المصري : كريم فريد
قصيدة : *** يا دين أمي ***
يا دين أمي ... علي القلب وجداره الهَش علي كُتر الكلام والوَّش علي الظلم فـ شهادة زور علي كل الصحاب البُور علي الحلم اللي عاش مبتور وعلي الصدق اللي أتنْفي وأتنَش
يا دين أمي ...
علي الخَلق اللي كفرانه علي الأم اللي شقيانه علي أب .. مخاصمو النوم عشان حالف يكُلها حلال علي الحَوجة وذُل المال
يا دين أمي ...
علي الصحة اللي فـ النازل ولا يوجد بديل ليها علي البنت اللي تتنازل فـ ينطفي نورها بأديها وتدبل قبل ما تفتح !
علي الناس اللي تعرفهم وتتمنا تعيش بيهم وتعلا عشان تشرفهم تنام وتقوم بترضيهم وتييجي الصدفة تكشفهم فـ يشبهوا للي قبليهم تتوة مـ الصدمة تتحسر عشان واخد خازوق فيهم
يا دين أمي ...
علي الحب اللي مفهوم ضعف علي الصبر اللي مفهوم خوف علي الضحك اللي مفهوم فرح دي ناس خايبة قليلة الشوف
يا دين أمي ...
علي خيانة بدون تبرير علي الفُجر وهري كتير علي عَبَط اللي كان بيغير علي واحدة حبيبت الكُل علي الورد .. وعلي الفُل
يا دين أمي ...
علي حُزنك بدون داعي علي عيشتَك مع أفاعي وأساتذت كدب علي ساذج ومش واعي عشان ده بجد كان بيحب
يا دين أمي ...
علي التشابه والتضاد اللي بيفسد كل حاجة علي اللي يرضي يهين كرامته وقال دي طيبة لأ .. سذاجة التضحية فـ الأصل كدب كل حاجة قصدها حاجة وبدون خجل من إني جاهل انا نفسي أفهم كل حاجة ازاي بتشبة كل حاجة ! احساس مخيف .. بـ الملل وسؤال سخيف .. ليه أتسأل وملهوش أجابة ؟
يا دين أمي ...
علي الدنيا اللي بتعاند خطاوي طريق مكملتوش علي كل أما أقول هانت علي نهاية كتاب اصلا مفتحتهوش علي كل أما أقول شايف شروق فكرة وفاجأة تبوش قليل العقل يخاف مـ الوحدة ويقلق قليل البخت زرار نسيانه بيعلق
يا دين أمي ...
علي المبالغة المفرطة فـ معظم البدايات علي القساوة المفرطة فـ كلمة the end علي العند
يا دين أمي ...
علي الدم اللي صار سايل كما المية بتسقي الارض
كريم_فريد
مجلة الوقت العربي - قصيدة : يا دين أمــــــي ))) الشاعر المصري : كريم فريد
موضوع: مجلة الوقت العربي - قصيدة : يا دين أمــــــي ))) الشاعر المصري : كريم فريد 
الخميس أبريل 10, 2014 8:05 am
